آدین نه دیر؟
منی تانیدینمی؟
بو سیزلایان غریبسهمیش سهگاهدا
تانیدینمی منی؟
بولودلو هاوالارین آرخاسیندا.
سئوگیلیم!
قاباق ردیفده اوتورموشدوم
ساچیمین قاراجا بویاقلاریندا
زامانی تلسمهدن یورموشدوم
هانسی ماهنیدا راستلاشدیق؟
هانسی درهده ؟ هانسی دوزده؟
"بو درهنین اوزونو
چوبان قیتر قوزونو"
سووشدو ایچیمدن.
هانسی کوز وورموش باغدا؟
هانسی قاراچاغدا؟
هانسی شیکستهده؟
هانسی ایزده؟
منی تانیدینمی سئوگیلیم!
"دویغولاریم دیله گلدی یئنه"
باخدینمی گؤزلریمین آغینا- قاراسینا؟
یوخسا اورک گؤزگومون کاسینا
تانیدینمی منی؟
سئوگیلی تورکولریمیزده منی اونوتدون
گنج بوداقلاریمی
پاییز نتلاریندا قوروتدون
"کیم سوسدورا بیلر بیزیم تورکوموزو کیم؟"
ائشیتدینمی منی؟
یئللرین توتغون بوغازیندا
سولارین سسینده
یاغیش دنهجیکلرینین آوازیندا
کؤورک یوخولاریندا منی آختاردین؟
منی آواردینمی؟
" اذن وئرسن گؤزلیم
بیرگئجه گللم یوخووا"
من ده ائشیدیلدی
سئوگیلیم مَهیَر
بیز آیریلمیشیق
اللریمیزدن مَهیَر کسیلیب ایشیق
آیریلیق دئیهنده یادیما دوشور
"آیریلیق آیریلیق آمان آیریلیق"
فرهاد دانیشیر
"هر بیر درددن اولار..."
یوخ سئوگیلیم!
سنده گوناه یوخدور
ساوالان قاری اَیلهنیبدیر
ساققالیمدا
چاتیلمایان یوللارین
یوکو وار دالیمدا
بایاتیلار آغی دئییر
قارالمیش قاندالیمدا
" من عاشیق قارا باغلار
آغ اوستن قارا باغلار
شیروانین حسرتیندن
اوره ییم یارا باغلار"
منی ایتیردینمی؟
ایللرین داریسقال دؤنگهلرینده
منی آزغین فصیللرین نفسینده
بیتیردینمی؟
یادیما حیدربابانی گتریدینمی؟
" هئچ بیلمزدیم دؤنگهلر وار
دؤنوم وار
ایتگین لیک وار
آیریلیق وار..."
سئوگیلیم!
فیلیملردن محزون باخیلیرام
آتوشگهسیز صاباحلارین کوچهلرینه
سنسیزلیکده یاخیلیرام
تانینمایان گؤزلرده
سیخیلیرام
منی گؤردون مو؟
منی بیلدینمی؟
خاطیریندهدیر گلنده ایلک باهار
کوچهلره سو سپمیشدیم
صحنهده بَتر شاخدایدی
اَلیمی آغزیما تپمیشدیم
بیردن " مؤذن " اوخودو
"چیلهرم صوبحه کیمین
روحومو نمنم یوخووا"
من آییلمادیم
سنایسه اوخشاتدین منه
قاباقدا بیرین
کنسرتین سونو ایدی
"نیما" دئدی:
بیرینجی واریاسیوندا
بارماقلارینی
یادیندان چیخارتما
من آنجاق بارماقلاریم
قاپینیزین جفتهسینده
قالمیشدی
سالونو
دومان آلمیشدی
تانیمادین منی
منی تانیمادین
سوروشدون ائلهبیل
نهدیر آدین؟!